അർച്ചനപ്പൂവ്

ചന്ദനനിറമുള്ള ബ്ലൌസും കടുംനീല പാവാടയും ധരിച്ച് ഒറ്റയ്ക്കും കൂട്ടമായും റോഡിന്റെ ഓരം ചേർന്ന് നടന്നു പോകുന്ന പെൺകുട്ടികൾ..  ഇവർക്കിടയിൽ നിന്ന് അർച്ചന എന്ന പെൺകുട്ടി മാത്രം പെട്ടന്ന് അപ്രത്യക്ഷയാകുന്നതെങ്ങനെ? ആൾക്കൂട്ടത്തിൽ പെട്ടന്നലിഞ്ഞു ചേർന്നതു പോലെ?
  
ഡിസംബർ 7
മഞ്ഞുവീണു തണുത്ത ആ സായാഹ്നത്തിന് യാതൊരു പ്രത്യേകതയുമുണ്ടായിരുന്നില്ല. അർച്ചന എന്ന ഒമ്പതാം ക്ലാസുകാരി സ്കൂൾ വിട്ട് വീട്ടിൽ തിരിച്ചെത്തിയില്ല എന്നതൊഴിച്ചാൽ.. അന്നു വൈകുന്നേരം ട്യൂഷൻ ക്ലാസിലും അവൾ ചെന്നിരുന്നില്ലെന്ന് ടീച്ചർ അറ്റൻഡൻസ് റെക്കോർഡ് തുറന്നു കാട്ടി.


ഡിസംബർ 11 
അർച്ചനയെ കാണാതായിട്ട് ഇന്നു നാലാം ദിവസം. പോലീസ് അന്വേഷണമ്പുരോഗമിക്കുന്നു. അന്വേഷണം സംസ്ഥാനമൊട്ടാകെ വ്യാപിപ്പിച്ചിട്ടുണ്ട്. എന്നാലും എവിടെയായിരിക്കുമവൾ? കിഴക്കൻ കാറ്റിനു പോലും ഒരു പിടിയുമില്ല. എന്തായാലും അർച്ചനയുടെ വീടു വരെ ഒന്നു പോയി നോക്കാം. കാറ്റു ദിശ മാറി വീശി അർച്ചനയുടെ വീട്ടിലേക്ക്..........

കരിയിലകൾ നിറഞ്ഞ മുറ്റം.. കാറ്റിനെ കണ്ടവ മുകളിലേക്കുയർന്ന് സന്തോഷം പ്രകടിപ്പിച്ചു. നാലു ദിവസം മുമ്പു വരെ ഇതേ മുറ്റത്ത് ഈ കരിയിലകൾ കണക്കേ തന്നെ പാറിപ്പറന്നു നടന്ന കുട്ടി... ദിശയില്ലാതെ വന്നൊരു ചുഴലിക്കാറ്റിൽ പെട്ട് ദൂരെ മറഞ്ഞൊരു കരിയില പോലെ അവൾ....................
കിഴക്കൻ കാറ്റ് വീടിനകത്തേക്ക് പ്രവേശിച്ചു. സെറ്റിയിൽ തളർന്നുറങ്ങുന്ന അർച്ചനയുടെ അമ്മ.. ചാനലുകാരെ ഏതു നിമിഷവും പ്രതീക്ഷിക്കാമെന്നതു കൊണ്ടാകണം; വെളുപ്പിൽ കറുത്ത കരയുള്ള കോട്ടൺസാരി ഭംഗിയായി തന്നെ ഞൊറിഞ്ഞുടുത്തിരിക്കുന്നു. കവിളിൽ ഇനിയും ഉണങ്ങിയിട്ടില്ലാത്ത കണ്ണീർച്ചാലുകൾ.. ആർദ്രതയോടെ ആ കൺപീലികളിൽ പതിയെ ഉമ്മ വെച്ച് തലോടവേ കാറ്റ് ഞെട്ടി പകച്ചു- ഗ്ലിസറിന്റെ മണം!
നിരന്തരം വഴക്കടിച്ചു കൊണ്ടിരുന്ന ആ ദമ്പതിമാർക്ക് അർച്ചന എന്ന പെൺകുട്ടി ഇനി ബാധ്യതയാകില്ല. അവളുടെ ഉത്തരവാദിത്വം ആരേറ്റെടുക്കും എന്ന തർക്കം കാരണം ഡൈവോഴ്സ് ഇനി നീണ്ടു പോവുകയുമില്ല!
പൂജാമുറിയുടെ വാതില്ക്കൽ നിന്ന് വിങ്ങിക്കരഞ്ഞ ഒരമ്മയുടെ നൊമ്പരം കിഴക്കൻ കാറ്റും ഇന്നലെ ടി.വി. ന്യൂസിൽ കണ്ടതാണ്. അർച്ചന ഇനി തിരിച്ചു വരരുതേയെന്നാണോ ഇവരപ്പോൾ മനസ്സിൽ പ്രാർത്ഥിച്ചത്?
ക്ലബ്ബിൽ നിന്നും താൻ വരാൻ വൈകിയിരുന്നെന്നും രാവിലെ അർച്ചനയുടെ പെരുമാറ്റത്തിൽ അസ്വാഭാവികതയൊന്നും തോന്നിയിരുന്നുമില്ലെന്നാണ് അർച്ചനയെ കാണാതായ ദിവസം ഇവർ ചാനലിനോടും പത്രക്കാരോടും പറഞ്ഞത്. എന്നാലും അർച്ചനയിപ്പോൾ എവിടെയായിരിക്കും?


അകത്തെ മുറിയിൽ അസ്വസ്ഥനായി ഉലാത്തുന്ന അർച്ചനയുടെ ഡാഡി... ഏകമകളുടെ തിരോധാനം നാടു മുഴുവൻ ചർച്ചയായിരിക്കെ എങ്ങനെ ഓഫീസ് തുറക്കും എന്ന ടെൻഷൻ.. അല്ലെങ്കിലേ ബിസിനസ് നഷ്ടത്തിലാണ്. ഈ നശിച്ച പെണ്ണ് എവിടെപ്പോയി? ഇനി അവൾ തിരിച്ചു വന്നില്ലെങ്കിൽ ഇൻഷുറൻസിന്റെയും ഫിക്സഡ് ഡെപ്പോസിറ്റുകളുടെയും നോമിനികൾ ആരുടെ പേരിലേക്കു മാറ്റണം? സ്റ്റെനോ ഗീതികയുടെ പേരിലേക്കോ അതോ പാർട്ടിയിൽ വച്ച് ഈയിടെ കിട്ടിയ പുതിയ ഗേൾഫ്രണ്ട് ഷേർളിയുടെ പേരിലേക്കോ?
കാടുകയറുന്ന ആ ചിന്താഗതിയിൽ കിഴക്കൻ കാറ്റിന്റെ ഉള്ളം പൊള്ളി. അന്തരീക്ഷത്തിൽ ചൂടു കലർന്നു. വാക്കു കൊണ്ടും പ്രവൃത്തി കൊണ്ടും ഒരു കാലത്തും യോജിച്ചു പോകാതിരുന്ന ആ അച്ഛനമ്മമാർക്കിടയിൽ കിടന്നു വിങ്ങിയിരുന്ന അർച്ചന എന്ന പതിനാലുകാരിയെ കാറ്റിനോർമ്മയുണ്ട്. എട്ടുമണിയോടടുപ്പിച്ച് കയറിവന്നയുടനെ, ഫാഷൻ ചാനൽ കാണാൻ അമ്മയും ന്യൂസ് ചാനൽ കാണാൻ അച്ഛനും വഴക്കിട്ടുകൊണ്ടിരിക്കെ; കണ്ടു കൊണ്ടിരുന്ന സീരിയലുകൾ പാതിയിൽ ഇട്ടെറിഞ്ഞ് പാഠപുസ്തകങ്ങളിലേക്ക് മുഖം പൂഴ്ത്തുമായിരുന്ന, ആരോടും പരാതിയില്ലായിരുന്ന, നാലുവയസ്സിന്റെ നിഷ്കളങ്കത്വം അനുസ്മരിപ്പിക്കുമായിരുന്ന ഒരു പതിനാലുകാരി..


കാറ്റ് അർച്ചനയുടെ മുറിയിലേക്കു കടന്നു.കിടക്കയിൽ ചിതറിക്കിടന്നിരുന്ന പുസ്തകങ്ങൾക്കൊപ്പം ടെഡിബിയർ.. മേശപ്പുറത്ത് കിടന്നിരുന്ന ഡയറിയിൽ കാറ്റിന്റെ കണ്ണുടക്കി. കാറ്റിൽ ഡയറിത്താളുകൾ ഓരോന്നായി മറിഞ്ഞു.

"പ്രണയം അഗ്നിയാണ്. അതിലെരിയുകയാണു നമ്മൾ. ഓരോ അണുവും എരിഞ്ഞു തീരുന്നതുവരെയും ആ ചൂട് നമ്മൾ അറിയുകയേയില്ല..."
പതിനാലുകാരി കോറിയിട്ട വരികൾക്ക് താങ്ങാൻ കഴിയുന്നതിനേക്കാൾ ചൂടാണ്..


മുറിവിട്ടിറങ്ങി വെറുതേയൊന്നു ചുറ്റിലും കണ്ണോടിച്ചപ്പോൾ കാറ്റ് അമ്പരന്നു. ജനലിലൂടെ കീറിയെറിഞ്ഞിരിക്കുന്ന ഉപയോഗിച്ച റീച്ചാർജ് കാർഡുകൾ.... മൊബൈലില്ലാത്ത സ്കൂൾകുട്ടിയ്ക്കെന്തിനാണ്  റീച്ചാർജ് കാർഡുകൾ.??


കിഴക്കൻ കാറ്റിന്റെ ലക്ഷ്യമിനി അർച്ചനയുടെ സ്കൂളാണ്. ചാനലുകാരുടെ ചോദ്യങ്ങൾക്ക് യന്ത്രികമായെന്നവണ്ണം മറുപടി പറയുന്ന അർച്ചനയുടെ സഹപാഠികൾ.
"ഇല്ല, അർച്ചനയ്ക്ക് ഞങ്ങളാരുമായും കൂട്ടുണ്ടായിരുന്നില്ല. ക്ലാസിലെ കാര്യങ്ങളെ കവിഞ്ഞവൾ ഞങ്ങളോടധികം സംസാരിക്കാറേ ഉണ്ടായിരുന്നില്ല.."
' ബഹളങ്ങളൊന്നുമില്ലാത്ത, പൊതുവേ അന്തർമുഖയായ ഒരു ആവറേജ് വിദ്യാർത്ഥിനി.അർച്ചനയെ കുറിച്ച് ക്ലാസ് ടീച്ചർക്ക് ഓർത്തെടുക്കാൻ കഴിയുന്നത് ഇത്രമാത്രം.

അർച്ചനയെ അവസാനമായി കണ്ടത്..............
സ്കൂൾ വിട്ട് ബസ് സ്റ്റോപ്പിലേക്ക് നടക്കുന്ന സഹപാഠികൾക്ക് ഏറ്റവും പിറകിലായി അർച്ചനയുമുണ്ടായിരുന്നു. ബസ് സ്റ്റോപ്പ് വരെ. അവളുടെ സ്കൂൾ ബാഗിനന്നെന്തു കൊണ്ടോ പതിവിലും ഭാരമുണ്ടായിരുന്നോ എന്ന് ഒന്നു രണ്ടു പേർ സംശയം പ്രകടിപ്പിച്ചു....... സംശയം മാത്രം.......

പതിവായവൾ കയറുന്ന ബസ് വന്നു നിന്നതും അവർക്കോർമ്മയുണ്ട്. ആരുമപ്പോൾ അർച്ചനയെ ശ്രദ്ധിച്ചില്ല. ബസ് പോയപ്പോൾ സ്റ്റോപ്പിൽ അർച്ചനയുണ്ടായിരുന്നില്ലെന്ന് ബസ് സ്റ്റോപ്പിൽ അവശേഷിച്ചവർ തീർത്തു പറയുന്നു. എന്നാൽ ബസിലുണ്ടായിരുന്ന സഹപാഠികൾ ട്യൂഷൻ ക്ലാസിനു മുന്നിൽ ഇറങ്ങിയപ്പോൾ കൂടെ അർച്ചനയുണ്ടായിരുന്നില്ല. ബസിനകത്തേക്ക് അവർ നോക്കിയപ്പോഴും അവളതിൽ ഉണ്ടായിരുന്നില്ല. കൂടെ കയറിയിരുന്നതായി ആരും ഓർക്കുന്നുമില്ല. ബസിൽ കയറിയിട്ടുണ്ടാവില്ലെന്നും ട്യൂഷനു വരാതെ നേരേ വീട്ടിൽ പോയിരിക്കുമെന്നാണ് അവരോർത്തത്.


സ്കൂളിനു മുന്നിൽ ബസ് നിർത്തിയപ്പോൾ തൊട്ടു പിന്നിൽ വന്നു നിന്ന നീല ഓമ്നി വാനിനെ ഓർക്കാൻ അവർക്ക് പ്രത്യേകിച്ച് കാരണങ്ങളൊന്നും ഇല്ലായിരുന്നു. അതിനെ കുറിച്ചൊന്നുമവിടെ പരാമർശിക്കപ്പെട്ടതുമില്ല..


അർച്ചന അവർക്കൊരു പ്രഹേളികയായി തുടർന്നു. നിന്ന നില്പ്പിൽ അവളെങ്ങോട്ട് അപ്രത്യക്ഷയായി?

ഉത്തരമില്ലാത്ത ചോദ്യവുമായി കിഴക്കൻ കാറ്റ് അതിനു ശേഷവും പലയിടങ്ങളിൽ അലഞ്ഞു നടന്നു.


പിന്നെയും നാലു ദിവസങ്ങൾക്കു ശേഷം, നഗരത്തിലെ കോൺക്രീറ്റ് സ്ലാബുകൾക്കു താഴെ, ഓടയിൽ ഒഴുകി നടന്നിരുന്ന ഒരു ജഡം; നീലപ്പാവാടയാണുടുത്തിരുന്നതെന്ന് അവരാരുമറിഞ്ഞില്ല. നഗരത്തിലെ മാലിന്യങ്ങളുടെ ദുർഗന്ധം പേറി അലഞ്ഞിരുന്ന കിഴക്കൻ കാറ്റു പോലും................